👩🏻💻 Freelance الفريلانس
🐼 مش الدبة الباندة
ازيكم عاملين ايه اتمني تكونوا بخير وزي الفل ❤️
الأسبوع دا هكلمكم عن العمل الحر او الفريلانس وهديكم فكرة بشكل مفصل شوية تبتدوا ازاي صح لو لسه مش عارفين تبتدوا منين.
ايه هو الفريلانس الأول؟ ببساطة خالص بشتغل مع نفسي عن طريق الانترنت وبقدم خدمة او مهارة لعملاء او لشركات ودا بيخلي فيه مرونة في المكان والوقت وكمية الشغل واختيار الشغل.
بس خلي بالك العمل الحر مش طريقة سريعة تعمل بيها فلوس علي النت دي رحلة بتمشيها وتاخد وقتك فيها 🚨
طيب ايه هي المهارات اللي ممكن اشتغل بيها اونلاين كفريلانسر؟
موقع Upwork للعمل الحر عامل تصنيف لأعلي عشر مهارات مهمة للعمل الحر لسنة ٢٠٢٣ وعاملها لكل مجال يعني مثلا
اعلي مهارة للتكنولوجيا هي تصميم مواقع الويب
اعلي مهارة في التسويق هي الSEO
اعلي مهارة في خدمة العملا هي التواصل من خلال Email, chat, phone
اعلي مهارة في الcreative work هي ال graphic design
الترتيب واسم المجال موجود في الصورة اللي تحت دي 👇
بس في رأيي الشخصي ان المهارة مش هي المعضلة خالص - اي حد يعرف يتعلم أي حاجة (اقفل علي نفسك شهرين وركز علي المهارة دي وهتعرف تتعلمها كويس جدا)
طيب ايه المهم في الفريلانس اللي بيفرق حد عن التاني؟ ولازم ناخده في الاعتبار من اول يوم؟
لازم تحط الأولوية أنك تتعلم ازاي تلاقي عملاء تعلمها شغل وتقنعهم ازاي يشتغلوا معاك وتحافظ عليهم 🚨
• منصات العمل الحر (للخدمات) كتير جدا دلوقتي اشهرها
• Upwork – Freelancer – Fiverr
• مستقل – خمسات
💡 فكرة حلوة جدا انك تدخل علي مواقع للعمل الحر مش مشهورة لسه عشان بيكون المنافسة أقل وبيكون فيه شغل متاح لان منصة العمل الحر دي عشان تشتغل بتعمل شراكات مع الشركات دي انه تحط الشغل دا عندها بس فليه لا نستغل احنا دا - بس مهم تسعي انك تكبر نفسك علي. المواقع المشهورة زي UpWork
طيب ليه؟ عشان المواقع دي هتجيبلك شغل من غير ما انت تقدم عليه اصلا مع الوقت لانك اشتغلت كفاية وبقي عندك History و Reviews كفاية عن المهارة اللي انت كويس فيها. لدرجة انك هيتم ترشيحك انك تعمل شغل لعملاء بشكل تلقائي (لما انت بتشتغل اي موقع عمل حر بيكسب برضو - من مصلحتهم انك تشتغل اكتر)
خطوات مهمة جدا عشان تبدأ 🤝
هنحدد الأول احنا بنعرف نعمل ايه: هات ورقة واكتب انت ايه المهارات اللي انت شاطر فيها او ممكن تبقي شاطر فيها لو ركزت - اكتب اعلي ٣ مثلا
هندور ونشوف ايه اللي ماشي في السوق: انت ممكن تكون مصمم جرافيك بس انك تعمل لوجو لحد دلوقتي بقت مهارة مش مهمة دلوقتي عشان الادوات بتاعت الAI بتقوم بالمهمة دي اسرع واحسن واقل تكلفة لمعظم العملاء دلوقتي - طيب ايه اللي ماشي وممكن تشتغله في السوق دلوقتي؟ هل مثلا انك تعمل حملة اعلانية لشركة علي السوشيال ميديا فتكون اللي بتعمل تصميمات الposts وبتنزلها؟
دور علي عملاء في اماكن مش معروفة: لما تدور علي عملاء مش هتدور علي مواقع العمل الحر بس دا الطبيعي ودا المتعارف عليه فهيكون فيه منافسة عالية جدا. يعني مثلا لو انت بتعرف تعدل فيديوهات روح علي الانستاجرام وشوف مين صناع المحتوي اللي فوق ال ١٠٠ الف متابع ومستوي تعديل الفيديوهات بتاعهم محتاج تحسين. كدا انت العميل دا عارف انه بيجيله دخل من السوشيال ميديا ومعندوش مشكلة انه يدفعلك في مقابل انك تحسنله الفيديوهات اللي بيعملها
هنحدد احنا هناخد كام؟: لما تتكلم مع اي عميل بيكون حاطط في اعباره ان الشغل اللي انت هتعمله ليه هيجيب من وراه فلوس تانية بشكل غير مباشر - فمهم تشوف السوق حواليك بيسعر الخدمة اللي انت بتقدمها بكام - اسأل مين يعني؟ لو تعرف ناس في المجال او مجتمعات علي السوشيال ميديا دا هيساعد ولكن لو مفيش ادخل علي مواقع العمل الحر اللي اتكلمنا عليها فوق دي وهتعرف من خلال بحث بسيط
محتاجين نعمل حساب علي موقع من مواقع العمل الحر: دي مش محتاجة نتكلم عن قد ايه هي مهمة - انت محتاج تظهر نفسك كويس ودا سواء من انك تعمل حسابات علي مواقع العمل الحر او انك تنزل شغلك لو يناسب علي السوشيال ميديا و LinkedIn
ازاي نعمل عرض Proposal كويس: النقطة دي هتكلم عليها بتفاصيل اكتر تحت عشان مهمة
هنعمل سابقة اعمال portfolio: في اي موقع عمل حر بتسجل عليه هيطلي منك سابقة اعمال - يعني ايه؟ يعني اي شغل عملته فيما يتعلق بالمهارة اللي انت بتعرضها حطه في المكان دا. طيب دا ليه؟ عشان اولا العميل اللي هيشوف شغلك دا هيكون عايز ضمان انك شاطر فعلا وثانيا عشان انت تثبت انك بتطلع شغل كويس متعلق بالمهارة دي - طيب انا لسه ببتدي ومعنديش سابقة اعمال. اعمل ايه؟ اي مشاريع عملتها وانت بتتعلم المهارة - اختار منها الكويس وحطه في سابقة الأعمال عادي
ازاي تعمل عرض Proposal جامد 🔥
لازم نفهم المشروع كويس ونقرأه اكتر ن مرة
من كتر ما الناس بتستهتر بالنقطة دي العملاء بقوا بيحطوا كلمة مفتاحية جوا الوصف بتاع الشغل ويقولك اكتبها في العرض بتاعك عشان اتأكد انك قريت الكلام اللي انا كاتبه ومش بتقدم بشكل عشوائي وخلاص
خلي العرض شخصي مش حاجة او تمبلت عام
يعني ايه عرض شخصي؟ يعني اي كلام هتكتبه في العرض بتاعك يكون دايما بيعكس انه من تجربة شخصية وبتتكلم من خبرة وعملت دا قبل كدا وتقول انا كنت اشتغلت علي مشروع شبيه تقدر تتفرج عليه من هنا وغيره - استغل اي تشابه بين اللي عملته قبل كدا واللي العميل عايزه يتعمل عشان تقنعه ان انت الاختيار الانسب
لو فيه شغل عملته زي اللي بتقدم عليه اتكلم عنه
قول هتعمل الشغل ازاي وادي فكرة هتعمل ايه
انت هتتكلم عن ايه الفكرة او المخطط العام اللي هتمشي عليه عشان تشتغل عشان تدي للعميل ثقة انك هتشتغل علي طول وعارف انت بتعمل ايه - بس اوعي تروح تعمل الشغل وتبعته للعميل وتقوله انا خلصته وممكن تبعتلي الفلوس وكدا وهو لسه متلكمش معاك ومتفقش علي اي حاجة
لو فيه حاجة تميزك قولها واتكلم عنها
حط دايما call to action في الاخر
يعني ايه؟ يعني تقول في نهاية العرض انك جاهز تتكلم في اي تفاصيل او يلا ندخل مكالمة وتحسسه ان الخطوة الجاية هي انك منتظره ياخد اكشن عشان يتحرك
استغل أدوات الذكاء الاصطناعي بس ركز علي نقطة ٢
هوريكم مثال لشغل ومحتاج منكم تفكروا في الكلام اللي فوق دا وشوفوا ازاي هتصمموا عرض للعميل دا
Project Title: Social Media Video Campaign for a Local Coffee Shop
Client: Café Delight
Objective: Create a series of engaging and shareable social media videos to promote Café Delight's unique coffee blends and cozy atmosphere. The videos should showcase the coffee-making process, highlight the café's ambiance, and encourage viewers to visit.
:Deliverables
• A 60-second promotional video for Instagram and Facebook
• A set of shorter clips (15-30 seconds) for Instagram Stories
• Visual and auditory consistency across all videos
• Incorporation of Café Delight's branding elements
دلوقتي عايزكم تقارنوا اللي كتبتوه بواحد من المثالين اللي كتبتهم هنا دول بالمناسبة مثال منهم كويس ومثال وحش. قارنوه وشوفوا ايه الجوانب اللي غطيتوها والجوانب اللي متكلمتوش عنها.
علي فكرة فيه مشاكل برضو 😡
العمل الحر مش مناسب لكل الناس - الكلام اللي اتقال فوق دا كله يمكن باين انه بدون مشاكل ولكن الموضوع فيه تضحيات زي اي حاجة في الدنيا
الدخل مش ثابت ودا طبيعي: انت مش بتشتغل عند حد انت اللي بتدير كل حاجة من الاول للاخر بس لما يكون الدخل بتاعك في اسبوع اكتر من دخلك طول الشهر من وظيفتك العادية ساعتها هتتصالح مع فكرة المخاطرة بان الدخل ميكونش ثابت
صعوبة انك تلاقي عملا: انت مش داخل ارض فاضية وبتزرع فيها لوحدك - الناس كلها بتسعي للحرية المالية حوالين العالم كله - فالمنافسة شرسة علي العملا - فخد وقتك ومتعتبرش الموضوع قفل لو ممشاش معاك من اول مرة.
انت بتسيب ال ٩-٥ عشان تشتغل طول اليوم: اول ما بتشتغل انت بتكون بدل ما تروح الشغل الصبح الساعة ٩ وترجع الساعة ٥ مستريح انت طبيعي هتلاقي نفسك شغال طول اليوم عشان لسه بتبني قاعدة عملا لكن بعد كدا هتبدأ توازن بين حياتك وشغلك.
دا كانت تفاصيل مهمة جدا حبيت اشاركها معاكم من تجربتي مع العمل الحر لاكتر من ٤ سنين بس اكيد فيه منكم خاض تجارب كتير وممكن يساهم في تحديث المقال دا لاي حد هيقرأه فيكون مرجع كويس لأي حد حابب يبتدي في المجال دا. ممكن تكتب في تعليق هنا او ترد علي الايميل وهحدث المقال بأي اضافة منكم ❤️
اتمني يكون الكلام أضاف ليكم فكرة أو الهمكم عشان تاخدوا الخطوة الأولي المنظمة للبداية في العمل الحر سواء عشان تدخلوا فلوس لاول مرة او يكون مصرد دخل اضافي وهكون شاكر جدا لو شاركتوا استفادتكم من الايميلات دي علي السوشيال ميديا او مع صحابكم عشان يعرفوا هم كمان 😁
كلام جميل جدا وقوي 👏🫡✨️