التداول والاستثمار📈
فيه فرق كبير بين الاتنين
ازيكم عاملين ايه؟ ممكن بعضكم ميكنش وصله الEmail ان الخدمة اللي هبعت منها بعد كدا اتغيرت للخدمة دي اسمها substack الموقع دا كويس جدا جدا لاي حد فيكم عايز يبدأ يبعت ايميلات ومناسبة جدا للمحتوي العربي - هي بالمناسبة مجانية فمش هتدفع حاجة عشان تبدأ تعمل المجتمع الخاص بيك عن طريق الايميل.
خلينا نخش في المفيد بقا 👀
حابب اكلمكم النهاردة عن الفرق بين التداول والاستثمار وهنحط معاهم في النص مفهوم كدا منتشر كتير علي السوشيال ميديا وغالبا بيكون هو السبب ان الناس مش بتثق في الاستثمار وبيعتبروه نصب وخلاص 🤷🏻♀️
خلينا متفقين ان سواءًا بنتداول اول بنستثمر احنا يا بنشتري او بنبيع حاجة بكل بساطة يعني مثلا لما الناس بتقولك انا هشتري دهب وابيعه لما يغلي دا كدا بيعمل عملية تداول او مقايضة 🤝
اما بقا الفرق الجوهري بين التداول والاستثمار هو الفترة الزمنية اللي بيحصل الموضوع دا فيها. مصطلح الاستثمار دا دايما بيكون مربوط بطول المدة الزمنية يعني مثلا لو حد اشتري ١٠ جرام دهب بسعر ٢٠٠٠ جنيه للجرام مثلا وسابه خمس سنين لما سعر جرام الدهب بقا ٣٠٠٠ جنيه دلوقتي الشخص دا بنقول انه استثمر فلوسه في الدهب وكدا بعد خمس سنين عمل مكسب ١٠٠٠٠ جنيه لو قرر يسيل فلوسه ويبيع الدهب دا ⚜️
ايه بقا التداول دا؟ وليه دايما لما بتتقال الكلمة دي معظم الناس بتحس انه نصب؟ وليه دايما الشكل دا بيطلع في مخيلتك من الالوان الخضرا والحمرا زي الصورة دي 👇
هفهمك كل حاجة ببساطة خالص
التداول دا بيطلق علي عملية بيع او شراء السلع او الاسهم بغض النظر عن السوق اللي بتتداول فيه. ممكن عادي خالص تبيع وتشتري اسهم في شركات مصرية ولكن الموضوع دا مش منتشر عشان السوق المصري مش حيوي ومفيهوش سيولة كتيرة فمعظم المستثمرين بيبصوا برا للاسواق المالية الضخمة زي اوروبا وامريكا وغيرها
طيب ليه بيتقال عليه نصب لما هو بيع وشراء عادي؟ 🤦🏻♂️
عشان حاجتين. اولا ناس كتير اوي بيتضحك عليها وبيجيلها ناس تقولها هات فلوسك استثمرهالك والجو الحمضان دا ويطلع الشخص دا نصاب ويسرقك ويختفي. وطبعا الشخص دا مش عبيط مش هيعملها من يوم وليلة هيكون عادي بيديك ارباح كتير كل شهر وانت فاكر ان الدنيا تمام لحد ما تيجي انت بقا وتطمع اكتر وتديله فلوس اكتر وهوب تلاقيه اختفي ← اقرأ المقال دا عن ظاهرة المستريح وهتفهم قصدي ايه
ايه بقا الحاجة التانية؟ الخيارات الثنائية يا سيدي
دي بالمناسبة مش نصب خالص ولكن هي أداة مالية عادية جدا بس طريقة عملها هي اللي بتخليها خطر جدا وتخليك تخسر فلوسك بسرعة فتحس انك بيتنصب عليك هشرحلك مثال بسيط جدا. تعالي نرجع للدهب اللي سعره ٢٠٠٠ جنيه انت هتخش تحط الف جنيه في الحساب بتاعك اللي بتتداول عليه وهتراهن ان سعر الدهب هيكون فوق ٢٠٠٠ كمان عشر دقايق لو السعر بعد العشر دقايق بالظبط بقا فعلا فوق هتكسب ١٠٠٠ علي ال١٠٠٠ بتاعتك لو بقا كان تحت ال٢٠٠٠ هتخسر ال١٠٠٠ بتاعتك كلها. دا بشكل مبسط يعني ايه خيارات ثنائية. طبعا زيادة علي انها حرام فهي خطر جدا جدا عليك وعلي الفلوس اللي انت محوشها
فبكل بساطة ناس كتير هيحصلها دا او دا فهيكون الانطباع العام عن الموضوع اكيد انه نصب وفي الفيديو دا علي يوتيوب كنت اتكلمت بشكل مفصل علي موضوع النصب دا
دا كان ببساطة الفرق بين التداول والاستثمار والخيارات الثنائية 📈
📈 فيه محاضرة مجانية اتفرجوا عليها من هنا لو عايزين تفهموا اكتر عن التداول ← مقدمة عن التداول
📈 اللي حابب يحضر ورشة عمل هعملها مع فريق الأكاديمية عن ازاي تحقق اول دولار ليك اونلاين هتكون يوم ٢٥ اغسطس الجي في القاهرة ← تقدروا تحجزوا مكانكم من هنا
📈 لو حابب تتعرف علي الفريق وبنعلم تداول ازاي وايه هو التداول هتلاقي فيديو تعريفي عننا علي يوتيوب هنا